У гэтым годзе беларускае кiраўнiцтва ўвяло новае дзяржаўнае свята – Дзень нацыянальнага адзінства. Ён будзе адзначацца 17 верасня. Раней гэта дата была афіцыйна прызнана днём “уз’яднання Заходняй Беларусі з Беларускай ССР”. Адпаведны ўказ падпісаў Аляксандр Лукашэнка 7 чэрвеня. Урачыстасці таксама будуць адзначацца ў рамках абвешчанага “года нацыянальнага адзінства”.
Разам з абвяшчэннем “года нацыянальнага адзінства” ў апошнія месяцы у дзяржаўных СМІ назіраецца прапагандысцкая кампанія, у якой палякі прадстаўляюцца акупантамі і прыгнятальнікамі беларусаў. Перыяд 1921-1939 гг. параўноўваецца з генацыдам беларускага народа. Галоўны рэдактар дзяржаўнай газеты «Советская Белоруссия» Дзмітрый Жук у тэлепраграме «Беларусь 1» заявіў, што Польшча- гэта гіена Еўропы і здзейсніла генацыд. У тым жа рэчышчы дзяржаўнае тэлебачанне выпусцiла матэрыял, у якім беларускі праўладны палітык Андрэй Сыч заявіў, што ў 1930-я гады Польшча здзейсніла генацыд беларускага насельніцтва.
17 верасня – трагічная дата для палякаў, а таксама беларусаў, якія сталі ахвярамі сталінскіх рэпрэсій, стала, паводле прапаганды, сімвалам міру і згуртавання грамадства. Як казалі нашы мудрыя продкі, «зямля народам моцная». І Беларусь не раз пацвердзiла гэтую мудрасць у сваёй гісторыі. Каб пакінуць будучым пакаленням памяць аб сваім гістарычным вопыце, мы ўвасабляем яе ў дзяржаўных святах. У такіх, якія нагадваюць пра вялікія каштоўнасці міру на роднай зямлі, незалежнасць краіны і кансалiдацыя нацыі”,- сказаў Лукашэнка. З іншага боку, вызваліцелем Беларусі, паводле яго, з’яўляецца Іосіф Сталін: “Іосіф Сталін, мы павінны яму падзякаваць і нават трэба дзесьці яму помнік за гэта паставіць. Ён вырашыў гэтую праблему вельмі канкрэтна”. Змены ўносяцца і ў школьныя падручнікі. Так, у новым падручніку па гісторыі Беларусі сярод герояў згадваецца кiраўнiк савецкай ЧК Фелікс Дзяржынскі, асабіста адказны за “чырвоны тэрор”, у выніку якога ў 1918–1922 гадах было забіта ад 50 000 да 1,7 млн чалавек.
Разам з антыпольскай прапагандысцкай кампаніяй у Беларусі адбываецца масiраваная атака на польскую адукацыю і польскія грамадскія арганізацыі. Актывісты польскай меншасці Анжаліка Борыс і Анджэй Пачобут па-ранейшаму знаходзяцца ў турме. Сёлета Міністэрства адукацыі Беларусі пазбавіла польскіх дзяцей магчымасці здаваць іспыты на роднай мове.
“Усё гэта элементы гібрыднай вайны, гэта ўсё элементы антыдзяржаўнай дзейнасці. Нават тыя “танцы на касцях”, якія рабіліся там прадстаўнікамі розных так званых адукацыйных цэнтраў, — гэта не што іншае, як рэабілітацыя нацысцкіх злачынцаў, польскіх злачынцаў, і не што іншае, як элементы раскладання знутры нашага грамадства, асабліва моладзі, фарміраванне з іх нейкіх перадавых атрадаў, – сказаў генпракурор Андрэй Швед, абвінавачваючы польскіх настаўнікаў у «рэабілітацыі нацызму».
Выкарыстоўванне сталінскай рыторыкi, правакаванне польска-беларускага антаганiзму сталi аднымi з галоўных інструментаў афіцыйнай прапаганды пасля масавых пратэстаў у мінулым годзе. Ад таго часу гісторыя ўсё часцей выкарыстоўваецца ўладамі для прапагандысцкай атакі супраць Польшчы і як нагода для рэпрэсій супраць актывістаў польскай меншасці ў Беларусі.
