Як паведамляе беларускі тэлеканал “АТН”, супрацоўнік польскага дыппрадстаўніцтва ў Брэсце неўзабаве будзе высланы з тэрыторыі Беларусі.
Такое рашэнне прыняло Міністэрства замежных спраў Беларусі, паведаміў прэс-сакратар МЗС Анатоль Глаз. Па словах Глаза, супрацоўнік польскага консульства ў Брэсце спрабаваў дапамагчы грамадзяніну Польшчы ўцякчы з Беларусі, якому цяпер забаронены выезд з Беларусі ў сувязі з аўтакатастрофай, якая адбылася 30 снежня пад Брэстам.
Як інфармуе Беларускае тэлебачанне, у аўтамабільнай аварыі з удзелам паляка загінулі дзве маладыя жанчыны, грамадзянкі Беларусі. У сувязі з гэтым пракуратура прыняла рашэнне аб прымяненні меры прымусу ў выглядзе часовага абмежавання магчымасці выезду з Беларусі. Як сцвярджае прэс-сакратар Анатоль Глаз, нягледзячы на забарону, 3 студзеня грамадзянін Польшчы спрабаваў перасекчы беларуска-польскую мяжу, дзе быў арыштаваны беларускімі памежнікамі. Па словах прадстаўніка МЗС Беларусі, уцёк з Беларусі нібыта спланавалі і арганізавалі супрацоўнікі Генеральнага консульства Рэспублікі Польшча ў Брэсце.
Гэтую сітуацыю беларускія праўладныя журналісты ўжо выкарыстоўваюць для сеяння прапаганды і нянавісці супраць Польшчы і палякаў, калі ў сацыяльнай сетцы Telegram, не чакаючы заканчэннярасследавання і рашэння суда, адназначна абвінавачваюць польскага кіроўцу ў забойстве дзвюх беларусак.
