Рэпрэсіі супраць беларусаў за актыўную грамадзянскую пазіцыю, антываенныя пратэсты і супрацiў агрэсіўным дзеянням рэжыму працягваюцца: грамадзян затрымліваюць, абшукваюць, у дачыненні да беларусаў ужываюць іншыя формы ціску, паведамляе ПЦ «Вясна».
У нядзелю МУС Беларусі паведаміла, што за антываенныя лозунгі былi затрыманы 800 чалавек. Арышты былі, між іншым, у Мінску, Баранавічах, Лідзе, Докшыцах, Гродне, Полацку, Наваполацку, Жодзіне, Віцебску, Светлагорску, Гомелі, Заслаўле, Магілёве, Бабруйску, Слуцку, Пінску, Копішчы, Смаргоні, Жлобіне, Брэсце, Дзяржынску.
Нягледзячы на жорсткія рэпрэсіі супраць беларускага народа, у панядзелак грамадзяне зноў выйшлі пратэставаць супраць уварвання Расiйскай Федэрацыі ва Украіну. У спісе ПЦ “Вясна” – 61 затрыманы, у тым ліку ёсць непаўналетнія.
Па словах праваабаронцаў, суддзі ўжо разгледзелі не менш за 100 адміністрацыйных спраў. На гэты момант арыштаваны больш за 91 беларус.
