У былым палацы Валовічаў у Свяцку завяршаюцца работы першай чаргі рэканструкцыі. Неўзабаве плануецца адкрыць частку палаца для наведвальнікаў, паведаміў партал Hrodna.life. Дакладная дата адкрыцця пакуль не называецца.
«Завяршаюцца працы ў рамках першай чаргі рэканструкцыі палацава-паркавага комплексу. Быў цалкам адноўлены знешні выгляд, праведзены ўнутраныя працы ў флігелях і галерэях палаца. У левым флігелі, напрыклад, размясціліся гасцінічныя нумары, якія хутка будуць прымаць пастаяльцаў, у левай галерэі – актыўна ідзе добраўпарадкаванне рэстарана. На тэрыторыі комплексу таксама з’явіўся і цалкам завершаны гасцявы домік з басейнам, саунай, більярдным сталом», — сказаў навуковы кіраўнік праекта па рэканструкцыі сядзібы ў Свяцку Анатоль Пархута.
Помнік з’яўляецца найлепш захаванай магнацкай рэзідэнцыяй Беларусі. Палац быў пабудаваны каралеўскім архітэктарам для графа Антонія Валовіча. Маёмасць у Свяцку заставалася ў руках Валовічаў да канца ХІХ ст.
Палац быў разбураны падчас Першай сусветнай вайны. У 1920-я гады разбураны палац быў выкуплены ў сям’і Гумніцкіх Дэпартаментам аховы здароўя польскага ўрада з намерам ператварыць яго ў санаторый для наркаманаў. Палац быў грунтоўна рамантаваны і рэстаўраваны ў 1930-1933 гадах па праекце архітэктара Оскара Сасноўскага і заставаўся дзяржаўнай уласнасцю да 1939 года. Пазней тут размяшчаўся савецкі супрацьтуберкулёзны санаторый «Свяцк».
Крыніца: hrodna.life/wikipedia.org