Праект новага нацыянальнага пашпарта Беларусі прадставіў на канферэнцыі «Новая Беларусь 2023» у Варшаве прадстаўнік па міжнародных справах Аб’яднанага пераходнага кабінета Валерый Кавалеўскі.
Паводле слоў Кавалеўскага, геральдычная камісія зыходзіла ў сваім праекце з еўрапейскіх традыцый. Быў і беларускі нацыянальны герб «Пагоня».
«Мы цяпер вядзем перамовы аб прызнанні гэтага дакумента. Ёсць пэўныя пазітыўныя сігналы», — паведаміў Валерый Кавалеўскі.
Пасля прызнання нацыянальнага пашпарта Беларусі нацыянальнымі ўрадамі краін Еўрасаюза плануецца пачаць перамовы аб прызнанні дакумента па-за межамі ЕС.
Кавалеўскі падкрэсліў, што цяпер беларускі ўрад у выгнанні павінен набыць матэрыялы для вырабу фізічных узораў, неабходных для афіцыйнага прызнання пашпартоў
«Гэта будзе няпросты працэс. Гэты праект робіцца ўпершыню. Раней ніводная нацыянальная грамада не рабіла падобнага», — дадаў Валерый Кавалеўскі.
Нацыянальны пашпарт “Новай Беларусі” вырашылі распрацаваць пасля таго, як вялікая колькасць беларусаў, якія выехалі з краіны пасля масавых рэпрэсій, сутыкнулася з праблемай абмена пашпартоў праз дзеючыя дыпламатычныя прадстаўніцтвы Беларусі, якія падпарадкоўваюцца рэжыму Аляксандра Лукашэнкі.
Крыніца: svaboda.org
Фота: Аб’яднаны пераходны кабінет
