У гэтую суботу з нагоды 509-й гадавіны сумеснай перамогі пад Оршай вуліцамі Варшавы пройдзе Марш дружбы трох народаў, які завершыцца канцэртам пад адкрытым небам з удзелам польскіх, беларускiх і ўкраінскіх выканаўцаў. Адным з арганізатараў мерапрыемства з’яўляецца фундацыя “Маладыя крэсы”, якая аб’ядноўвае маладых палякаў з Усходу.
У пятніцу, 8 верасня, спаўняецца чарговая гадавіна бітвы пад Oршай, у якой польска-літоўскае войска пад камандаваннем гетмана Канстанціна Астрожскага разграміла колькасна пераўзыходзячыя сiлы Маскоўскага княства. Пасля аднаўлення незалежнасці Беларусі гадавіна перамогі пад Оршай была ўстаноўлена як Дзень беларускай вайсковай славы. Нягледзячы на тое, што гэтае свята было забароненa дыктатарскім рэжымам Лукашэнкі, яно па-ранейшаму адзначаецца ў беларускіх патрыятычных колах.
Урачыстасці з нагоды 509-й гадавіны пераможнай бітвы пад Оршай пачнуцца ў 15.00 гістарычнай дыскусіяй у Музеі Вольнай Беларусі па адрасе вул. Foksal 11, адкуль у 17.00 рушыць марш у бок Замкавай плошчы. Праз гадзіну ля калоны караля Жыгімонта пачнецца канцэрт беларускіх гуртоў «Dzieciuki» і «Літы талер», украінскага IZZI і польскага барда Матэвуша Нагурскага. Падчас мерапрыемства адбудзецца збор сродкаў для беларускіх добраахвотнікаў, якія ваююць ва Украіне.
Сярод арганізатараў мерапрыемства ёсць фундацыя «Маладыя крэсы», Полк Каліноўскага, Рух і Беларускі дом у Варшаве.
