У Аб’яднаным пераходным кабiнеце Беларусі была прадстаўлена інфармацыя аб выніках сустрэчы стыпендыятаў Праграмы ўрада Рэспублікі Польшча імя Канстанціна Каліноўскага, прызначанай для беларускіх студэнтаў у Польшчы, з яе каардынатарамі.
У сустрэчы прыняў удзел намеснік прадстаўніцы па нацыянальным адраджэнні Кабінета Павел Баркоўскі, намеснік міністра навукі і вышэйшай адукацыі Польшчы Анджэй Шэптыцкі, павераны ў справах Польшчы ў Беларусі (2020-01.2024) Марцін Вайцяхоўскі.
Павел Баркоўскі выказаў удзячнасць польскаму ўраду і дырэкцыі праграмы за існаванне гэтай ініцыятывы, гісторыя якой пачынаецца з пратэстаў пасля выбараў 2006 года і пачатку сістэмных рэпрэсій супраць беларускага студэнцтва.
Павел Баркоўскі выказаў гонар за прысутных і іх грамадзянскую пазіцыю, якая стала прычынай далучэння навучэнцаў да праграмы, і спадзяванне, што яны стануць карыснымі спецыялістамі для новай Беларусі.
Прадстаўнікі польскага боку адзначылі, што падтрымка беларускага грамадства ў яго імкненні да свабоды працягнецца як польскімі ўніверсітэтамі, так і дзяржаўнымі ўладамі Польшчы.
Сярод узнятых стыпендыятамі тэм:
- памер стыпендый і неабходнасць іх індэксацыі, своечасовасць выплат;
- стварэнне дапаможніка для новых удзельнікаў праграмы дзеля іх інтэграцыі ў польскае акадэмічнае асяроддзе;
- легалізацыя дакументаў, неабходных для навучання, праз цяжкасці з атрыманнем даных ЦТ і апастыля для навучэнцаў, якія падпадаюць пад пераслед у Беларусі;
- прынцыпы адбору кандыдатаў у працэсе рэкрутацыі;
- паляпшэнне ўзаемадзеяння з кіраўніцтвам праграмы і стварэнне інстытута абраных прадстаўнікоў навучальных груп (стараст).
Частка навучэнцаў выказала жаданне дапамагаць беларускім дэмсілам у іх дзейнасці.
Анджэй Шэптыцкі запэўніў, што з яго боку будуць прыкладзены намаганні для павышэння стыпендый праграмы Каліноўскага як найменей да ўзроўню памеру стыпендый праграм NAWA.
Дырэкцыя праграмы паабяцала стварыць дапаможнік для новых навучэнцаў і падбаць пра арганізацыю выбараў прадстаўнікоў навучальных груп.
Крыніца: t.me/CabinetBelarus
Фота: studium.uw.edu.pl
